زوجى واهله ظلمونى انا وامى ارجو الرد بسرعه يا شيخ

[سوسو السكره]

بسم الله الرحمن الرحيم
انا متزوجه واهل زوجى واهلى يسكنون فى منزل واحد ولكن انا اسكن قريبه منهم المشكله ان امى متزوجه من شخص وحصل خلاف بينهم وترك هذا الزوج الشقه لامى وكان عقد الشقه مكتوب بأسم امى وزوجها وعندما ترك زوج امى الشقه قعدنا فتره مش بندفع الايجار وعشان امى تدفع الايجار المتأخر حماتى قالتلها هاتى العقد من جوزك عشان انزل منه الفلوس وكان العقد مكتوب ايجار قديم فأمى جابت العقد من زوجها واول ما حماتى خدت العقد من امى قطعته وقالتلها هكتبه زى ما انا عايزه يا اما كده يا مش هكتب حاجه (ملحوظه الشقه التى تسكن بها امى من نصيب زوجى الشرعى فى الميراث)واتفق زوجى وامه على تقطيع العقد واحنا كانت نيتنا خير من ناحيتهم وبعد كده كتبت حماتى عقد ولكن قانون جديد بتسع سنين فقط ونحن الان فى اخر سنه من التسع سنين وحدث مشاكل كتير جدا بين امى وحماتى بسبب هذا العقد وبسبب غدرهم بينا ولكن فى النهايه امى سكتت عشانى وعشان جوزى .منذ ايام طلعت حماتى تاخد الايجار من اخويا وحصل مشكله لانه قالها هنزل اجيب فلوس وابعتها بليل وسبته حماتى وسبت امى وانا واحنا والله ما عملنا ليها حاجه هى كانت طالعه عشان تعمل مشكله عشان تعرفهم ان فاضلهم كام شهر ويسيبوا الشقه والشقه اصلا بتاعه جوزى اما جوزى بقى مش بيعرف يعمل اى حاجه مع اهله شاف امه وهى بتسبنا وبتعلى صوتها عندنا فى الشقه وماتكلمش ولا كلمه ودى مش اول مره كذا مره يحصل كده وامه بتخوفنا بأولادها الصبيان لانهم بلطجيه ومش كويسين واحنا كل الناس بتشكر فينا لاننا محترمين ودلوقتى غصبوا على جوزى يخرج امى من الشقه ويبيعها لاخته ب60 الف رغم انها تجيب 85 الف ومع ذلك وافق واعطى لامى 16 الف فقط عشان تمشى مع ان مش من حقهم يمشوا امى ولكن بسبب غدرهم وتقطيع العقد امى مضطره تمشى .
انا دلوقتى مش عارفه اعمل ايه كل الشقق غاليه جدا اقل حاجه 35 و40الف وهم كده نصبوا على امى وزوجى معاهم لانه وافق يبيع الشقه وعايزين امى تمشى خلال ايام وامى مريضه وغلبانه جدا وكمان انا دلوقتى جوزى نزل من نظرى ومبقتش حاسه معاه بالامان لان دى مش اول مره يعملوا معانا حاجه زى كده مره شتمونا وكسروا الباب على امى عشان كانوا بيتخانقوا ودخلنا جوزى عندنا ساعه الخناقه وهو هرب وسابنا احنا نتشتم منهم ونهزق
ده غير ان امه كانت بتاخد الايجار بتاعه 400ج 6سنين مع انها ميسوره الحال ومش محتاجه وهو الوحيد اللى كانت بتاخد ايجاره
انا دلوقتى مش عارفه اقف مع امى ضد جوزى اللى ضيع حقها وبهدلها هو واهله ولا اعمل ايه انا كرهته بسبب اهله وبسبب اللى عمله مع اهلى وكل حاجه ينصف اهله عليا ومضيع حقى انا كمان معاهم وعمره ما جابلى حقى مع انى عمرى ما عملت فيهم حاجه وحشه ولا قلت لحد فيهم اى كلمه تضايقه وهو متاكد وعارف كده كويس ومع ذلك بيعاملنى وحش جدا وعلى طول سايبنى وقاعد عندهم تحت البيت مع اخواته مع انه عارف انهم مش كويسين
مش عارفه اعمل ايه وامى كده هتترمى فى الشارع ومش عارفه اعملها ايه
انا اسفه انى طولت عليك يا شيخ بس كان لازم احكى من الاول
حسبى الله ونعم الوكيل فيهم لانهم ظلمونى انا وامى
ارجوك يا شيخ تقول لزوجى يعمل ايه ويعدل بينى وبينهم ويرجع حق امى